an year that passed by.....2014...

2014 ka aakhri din 
nahi guzaregaa yaadon ke bin

shaanti aur naman ki hamari aasha 
saal ke anth mein reh gaya bas niraasha

kai saalo se chal rahe telangana vibhajan ke naatak ko mila arth
alag raashtra se banakar ek naya charithr

modi sarkaar ka jaise chadha tha bhang
chadh rahe hai unhi ke iraadon ke bhi rang

jahan ban rahe the sarkaar
wahi raajnaitik netha ladh rahe the paane adhikar

roz ke is naatak mein dhoondh hi rahe the shaanti
beas ki nadi mein beh gayi ummeed aur reh gayi bas dard aur bhaanti

jaise kisi bache ka khilona
laga havai jahajo ka ghum hona

prakruti ka vikalp ya insaan ki laaparvahi
dard mein bilakhte parivaar ya sarkaar
kaun dega is baat ki gavaahi

kitanu bhi ho rahe hai taaakatvar
duniya dara hai dekh kar ebola ka asar
na jaane kab poora hoga dawai ke anusandhan ka safar

soch hi rahe the ye saal raha atankvaad se door
wahi bhaasha bolne wale hi reh gaye majboor

paathshaala jo maana jaata hai pavitr
sama gaya na jaane kitne kabr
har batche ke mann mein baith gaya hai darr

nahi laga paaya koi kaanoon is par niyantran
aaj bhi ho rahe hai aurat par shoshan

khushiyon aur ghamon ka sangam
2014 ka tha yehi sargam

door kare hum sab nafrat aur gusse ki bhaavna
duniya mein bani rahe shaanti aur naman
wahi hai aaj bhi meri kaamna

isi aasha mein guzar gaya ek saal
dekhna hai kaisa hoga 2015 ka haal

kis se jatau mein apne mann ki vyatha 

kyon nahi door hoti ye baadha 

aaj samjhi nahi banaani chahiye kisi bhi rishtey mein koi bandhan 

har koi chod jaata hai dekar dard aur chuban 

galat nahi hoon phir bhi hai dukh 

aankon se nahi rukte ye ashk 

akele rehne mein hi hai zindagi 

akele hi paana hai har bandagi 

kambal mein simte guzar jaati hai sardi

paseene bahate nikal jaati hai garmi

mausam ke saath jab badalte hai zaroorat

insaan ne apnaya prakruti ki yehi hasrat

badalte mausam aur rang hi hai zindagi ki haqueekat 

sapnon mein aata hai bekhabar 
jaata hai meri neendein churakar 
asliyat mein na mili uski koi khabar 
aaj bhi dhoonde ye nigahein use darbadar

Swatch Bhaarat

Modi ji ne diya swatch bhaarat ka pigaam 

har koi jud gaya dene use anjaam 

desh ko sundar banaane ka har nagarik ne liya hai bhaar 

rang la raha hai sabki mehnat ka saar 

sirf dikhavati sundarta ko agar de rahe hai mahatv

nahi hai ye swatchta ka asli tatv

dil se gangadi nikal ne ka hai waqt 

mann ki burai se ladne sabhi ko hona hai sakht 

sarvajanik sneh ke pradarshan se agar desh ki jaati ho rahi bhrasht 

to kya desh mein ho rahe atyacharon se aapki jaati hai samarth????

jab vidhya daan karne wale guru bech rahe hai apna imaan 

kis rishte ka kare hum sammaan???

agar aisi swatchta ki rakhte hai hum aas

safal ho jayega swatch bhaarat ka prayaas

jab dilon mein bhara ho itna gand

kahan mehsoos kar payenge swatch bhaarat ka sugandh 

asli swatchta ka agar mil kar karte hai prayaas

tab Modi ji ki ye pehel hogi khaas

guzar gaya waqt badal gaye taareek
par beete kal se kya liya humne koi seekh??

dil ko mili hi thi raahat ki sukoon
banaye gaye kaanoon 
dikhi wo badlaav ki junoon

lagayi sabne milke ummeed ki jyoti
par nahi ban payi wo badlav ki kranti

kal bhi stri par ho rahe the atyachar
aaj bhi hai desh ka wahi haal

par kehte hai ladki ki vesh bhusha ka hai kusoor
apni gandi soch pe kab ghaur karoge huzoor

uthar jaate ho us jaanwar ki aukaat
phir kya vesh bhusha ya umr ki baat

aise gunaah kar jaata hai koi gumnaam
har koi ho jaata hai badnaam

nahi dena mujhe kisi ko dosh
kyon ki sabhi ko vikasit karna hai soch

ab nahi reh jaata dasara ya diwali ka mahatv
jab dilon mein nahi hai tyohaar ka asli tatv

is tyohaar rakhte hai bas yehi chaahat
jeena seekho dikhakar thodi insaaniyat

Raat ka nasha 

har raat neend mein aata hai ek chehra 

jo bana deta hai mere sapne ko sunehra 

raat bhar karte ho mujhse lambi baatein 

din mein ojhal ho jaate ho banke yaadein 

sang lekar aate ho khushiyon ki mehek aur ankhon mein chamak 

raat ke andhere mein dete ho sukoon, shanti ka dastak 

tumhare honton par alag lagta hai mera hi naam 

jo jod deti hai tumhare pyaar ka paigaam

din bhar mann mein aate hai bas tumhare hi vichaar 

soch ti hoon shayad tum bhi kahin kar rahe ho mera aitbaar 

nahi jaanti hai bhi ya nahi tumhara astitv 

agar hai to saump do tumhe apna sarvasv 

kabhi sapne mein hi kar do apne pyaar ka izhaar 

zindagi jeene ka mil jayega mujhe bhi saar 

bhar jayega meri zindagi mein khushiyon ka bhandaar 

jee lungi karte isi sapne ka aitbaar 

sapne

bohot kam log hote hai itne khushnaseeb 

jo pahunchte hai apne sapnon ke kareeb 

uske zindagi ka yehi raha hai kissa 

us kam ka kabhi na thi wo hissa 

apne dil ke sapnon ko dena chahti thi udaan 

chand haalaton ne maang liya uske sapnon ka balidaan 

aaj paa liya hai usne zindagi ki har suvidha 

par nahi bhula saki apne mann ki vyatha

mushkil hai bhula paana ateet 

jab wo tha uske zindagi ka asli preet 

seekh liya usne waqt ke anusaar chalna 

chod diya usne ab sapne dekhna 

apne sapne ki kabr dil mein liye 

phir bhi hasi ka kaftaan pehne 

jiye jaa rahi hai pagli jahan zindagi chale

Happy Dussehra

desh ke har kone mein ho raha hai raavan dahan 
burai par atchai ki jeet ka mana rahe hai jashn 

seeta mayya ne bitaya virah mein raavan ki lanka mein vaas
phir bhi mahaan hai Ram kyon ki unhone pura kiya vanvaas 

chahe ho treya yug ya dwapar yug ya aaj ke kali yug ka taraana 
aurat par zulm se hi deta hai mardaangi ka pradarshan ye zamaana

Mahishasur ke marthan ka bhi manate hai aaj tyohaar 
devi maa ne kiya shakti ka roop dhaar

ab toot ne laga hai hamari bhi sabr ka baandh
hum bhi nikal pade banane dharm ki buniyad

agar aise hi hota hai adharm ka naash
hum bhi tayaar hai karne mann se adharm ka vinaash

nahi karna shakti ya durga ka roop hume dhaaran
bas dena hai hamari himmat ka ek chota pradarshan

ai maa sun lena aaj meri ye prarthana
dena himmat, kyon ki phir se hai atchai ki neev hume bun na

Paisa Paisa

sach hi kehte hai paisa hi hai har jad ka fasaad
aaj dekh bhi liya use hilate rishton ki buniyaad

jab do dilon ke beech aa jaata hai paisa
kamzor ho jaata hai har rishta

maana paisa hai aaj ke zindagi ki zaroorat
par kyon dene lage hai har rishte se upar paise ko ehmiyat??
kya nahi reh gayi hai dilon ke rishton ki koi izzat??

lagta hai karna padega tol mol ke har baat
kyon ki aaj insaan ke liye paise se badhkar to nahi hai koi jazbaat

jab badal hi gaye hai insaan ke soch
kyon de rahi hoon paise ko dosh??

badal gaye hai waqt
jeena hai banakar dil ko sakht
jab tak nahi pahunchte maut ka takt

kuch alag.......

ae zindagi le chal mujhe wahan 
sheher ki ye shor na ho jahan 

na ho sampark ka koi saadhan 
prakruti ke tark par chale ye jeevan 

taazgi ki hawaaon se bharpoor 
is kalushit vataavaran se door 

sun saku apne dil ki awaaz
mehsoos kar saku nirmal aanand ka ehsaas

kaanon mein gunje jahan prakrutik sangeet
pani ka jharna chidiyon ke wo geet

maanti hoon sheher ke is pradushan mein hi hai zindagi
par jeena chahu kuch palon ki wo taazgi

prakruti ke baahon mein kho jau kuch pal
bhool jau asliyat ke is zindagi mein ho rahe chal

ae zindagi le chal mujhe wahan
zindagi ke rangmanch ke naatak se naata na ho jahan

Meri naani 

har pal pehne sundar si muskaan 

aaj paa gayi wo nirvaan

hamesha sajti unke mukh ki laali 

yaad dilaye hume unki zindadili 

zindagi ke madhyantar par dard ko banakar apna humdum

apno ki khushi ke liye pee gayi wo saare gham 

parivaar ke liye deti rahi balidaan 

niswaarth jeevan unki pehchaan 

na kabhi kiya zindagi se shikayat 

zimmedari nibhate guzaar diya saara waqt 

aap hi se bandhi thi kai rishton ki dor 

hum reh gaye tanha aaj is or

sach hi kehte hai 

kisi ke jaane ke baad badh jaata hai unka mahatv 

kabhi na bhool payenge aapka ye pyaara astitv

Andhra Pradesh--- Telangana-- Residual AP 

bas itihaas hi padhegi telugu rashtra ki kahani
ab us telugu ki bhi ho gaye hai do alag zubaani

itne balidano aur himmat ko mila hai utkarsh
rang laaya itne saalo ka sangharsh

telangana ko mila hai naya astitv
rashtra naksh par hoga naye raashtra ka aavirbhav

sanyukht raajdhaani jo bana hai hyderabad
dono raashtra vaasiyon se hai jo sheher aabaad

dono raashtra ke mukhya mantri
bhool na jaaye sheher ki unnati

sabki itchaon ka karte saraahna
aapas mein bani rahe bhaai chaare ki bhaavna

dono rashtron ke nirman par sabhi ko dete hai subhkaamanayein
vikaas aur unnati par tiki rahe sarkaar hi nigaahein
raashtra vaasi ke ummedon par kabhi na aane paaye do raahein

stop reservation 

kab tak chalega jaati ke naam pe bhed bhaav 

kabh nazar aayega desh mein badlaav 

vidhya budhi ka lagta hai kam ho raha hai mahatv 

jab reservation ke kaam dheere dheere mitaya ja raha hai uska astitv 

unki vidya ke liye scholarship 

naukri mein unke liye alag hissa 

hamari vidya hamari mehnat ban ke reh jaati hai charcha ka bas ek kissa 

har kaarya mein aarakshit jaati ko hi jab mil rahe hai avasar 

vidyadaan jaise peshe mein bhi dikhe hai iska asar 

reservation chaatr badh jaate hai aage 

yogya chaatr reh jaate hai peeche 

ekta ki sabhi karte hai hukumat 

reservation mana karne ki koi dikha sakta hai himmat??

jab raas aa gaya hai aasaan sa path 

shobha nahi deta apko ekta ki vakaalat 

hoga jab muquable ka ek hi madhyam 

tab nazar aayega sabka parishram

ab waqt hai mitaye hum ye aarakshan 

desh mein asli samaanta ka dekar pradharshan 

asli pratibha ko dekar padh ka shaashan 

desh ki unnati ka bane hum bhi kaaran 

Ab ki baar modi sarkaar 

itne saalo ki congress raajneeti 
nahi nazar aayi desh ki unnati 

yuva bharat ke vote par hai jiske aankhen jami 
sooj booj, gyaan budhi ki dikhe hai jisme kami 
aisa neta bas badha sakega kursi ki garmi 

jo na nibha paaye ek rashtra ka kaarya charya 
kya wo laa payega desh mein anucharya 
nahi dekhna chahu hadtaalo se ghera raajya 

aam chai wale se jo ban gaye hai bade neta raajnaitik
budhi matta aur chaaturya ka jiske diya hai prateek

chahiye aisa neta jo nibha sake desh ki pragati ka bhaar
jise na ho bas apne matlab se pyaar

desh ki unnati jiska hai mool aadhaar
chahiye hume aisa sarkaar
bas ab ki baar modi sarkaar

Bhartiyata.....

apne rudhivaadi vichaar dhaara ko dekar desh ka naam 

kar rahe hai desh ko badnaam 

ladki ka utcha bolna anaitik 

ladki ka khul ke hasna asaanskrutik 

aadhunik vichaar dhaara rakhna asaamajik 

kyon ladkiyo ke liye hi banaye gaye hai niyam??

kab tak nibhaye aapki satta ka bhram??

maanti hoon mila hai bhaarat mein beti hone ka shraap 

shayad kiya hoga koi paap 

ab nahi sahi jaati ye zillat 

waqt aa gaya hai dikhau meri taakat 

nahi rok paoge meri vichaar dhaara 

nahi sehna bharatiya naari hone ka naara 

mere vichaaro par bhi agar karna chaho hukumat 

nahi karti mein aise mard ki izzat 

bharat mein mard ho kar mil gaya hoga tume shaasan 

par samjho aaj ki bharatiya naari nahi hai abala jo sahe tumhari shoshan 

Chunaav (Elections) 

Har jagah hai election ka shor 
Na jaane kiske pankh lagega ye mohr

Chunav se pehle har koi deta hai upanyas 
Nahi nazar aata unka desh ki unnati ke liye prayaas 

Desh mein ban gaye hai darzano party 
Har party ki ek hi neeti 
Khud ka vikaas aur khud ki pragati

Delhi ne di aam aadmi party ko hukumat
Aaj shayad khud ko aam aadmi kehte karte hai nafrat

Hisson mein bat raha hai desh
Phir bhi pehne hai bhinnata mein ekta ka vesh

Modi sarkar par hai sabko bharosa
Hum bhi yehi maan kar dil ko de rahe hai dilasa

Chahiye aisa neta
Jo samjha sake ek jhut hone ki mahaanta
Bana sake desh mein unnati ko ek pratha

आत्मा हत्या घोर पाप 

क्या आत्मा हत्या ही है हर मुक़श्किल का समाधान 
ऐसा होता तो क्या जीवित रहता कोई इंसान 

माना घम्  में खो जाती है सोचने कि क्षमता 
आजाती है ज़िन्दगी में उदासीनता 
ज़िन्दगी को बटोर कर क्या नहीं दिखा सकते थोड़ी सहनशीलता ???

माना ज़िन्दगी के एक मोड़ पर हुए है असफल 
पर क्या ज़िन्दगी हमेशा होगी युही निष्फल??

उस एक पल कि कमज़ोरी 
क्या कर देगी हमारी ज़िन्दगी अधूरी??

माना सपने टूटने का दर्द सहना है मुश्किल 
पर क्या एक ही सपना है ज़िन्दगी कि मंज़िल?
क्यों न करे दुसरे सपनों को हासिल??

जी जा तू वो एक कमज़ोर पल 
ज़िन्दगी हो जायेगी सफल 
बिखर गया तू अगर उस पल 
जीवन ही हो जायेगा ओझल 

मुस्कुराकर जीने का नाम ही है ज़िन्दगी 
हक़ीक़त हो जाएगी तुम्हारी बंदगी 

Women's day-- just a myth 

Seene mein sulagti aag 
Mit na payenge kabhi ye daag 

Kisi na kisi roop mein roz hota hai stri ka balatkaar
Kabhi tan pe lage zakhm to kabhi daba kar uske vichaar 

Har din kisi na kisi roop mein sehti hai zillat 
Kabhi kamzor maankar ya kabhi lootkar uski izzat 

Laga kar hamare dil mein dard ki chingari
Nahi bach payega koi bhi atyachaari

Nahi samjhe aisa hoga ikkisvi sadi ka sansaar
Jahan har din stri ko karna pade prahaar

Bekhauf jeevan hai hamari khwaish
Kab samjhega koi hamari ye guzarish

Na do hume jhote khushi ki kaamna
Banakar women's day ka bahana

Jis din samjhoge stri purush samaanta ka mahatv
Us din se hoga women's day ka astitv

...........

Chaye zindagi mein jab gham ka badal 
Himmat se karo use ojhal 

Kamzori ko jo dete hai apni zindagi ka hukumat
Wahi sharab ke sahare se paate hai himmat 

Kya sharab deta hai gham mein sahara? 
Phir bahengi har nukkad par sharab ki dhaara 

Jab khudi par na hai bharosa 
Sharaab se kya paoge dilasa

Dekhe hai kai jhagde
Isne to bas rishte hai bigaade

Bhulane kuch pal ke liye apne gham
Sharab ko banakar apna humdum
Na khona zindagi ka sayyam

Telangana 

Ban ne ja raha hai telangana 
Na kar sake is nirnay ko saraahna 

Na samjhe kya hai is rashtra ka bhavishya 
Andhra se bhai chara na hone dena hai adrushya 

Bharat ke bhavishya ke liye nahi liye gaye the koi nirnay 
Jab hua hamara azaadi se parichay 

Aaj telangana hai usi raah par 
Rashtra to ban gaya hai magar
Vibhajan ka shuru bhi ho jayega safar
Aaj bhi na samjhe bhavishya par iska asar

Ban kar na reh jaaye ye netao ki jeet
Unnati ki raah par chalne ka shuru kare reet

Valentine month :P 

Na do taane suna kar romeo juliet ki daastan
Pyaar ke liye agar romeo ne khoya apna jaan
Juliet ne bhi na becha tha apna imaan

Aaj jab mard pyaar mein poora karna chahe apne hasrat
Hum bhi rakh sakte hai aise hi chaahat

Dil se sanjote hai hum rishte
Dard bhi seh lete hai haste haste

Na kehna hamesha ladki gayi mujhe chod
Kabhi sochna kitne tukdon mein kiya uske dil ko tod

Rishton ka judna tootna to hai kudrat
Dil todna nahi hoti sabki fidrat

2013 ka safar 

chalo daalte hai beete kal par ek nazar 
2013 ka khatam hone chala hai safar

aatankvadi hamle se goonj utha tha hyderabad 
desh ki suraksha dal tab hui tainaat 

nirbhaya ne kanoon par lagayi nayi mohar 
us haadse ne macha diya desh mein gadar 

ladki par zulm se hi kyon dete hai mardangi ka pradarshan 
har ladki ki awaaz bani ladai ki garjan

jisne kiya itna bhayanak soshan
na bach paya dekar katchi umr ka kaaran

janam dene wale hi kar rahe hai hatya
aarushi ke jeevan ka bana ye bhayanak satya

khel se jud gaya tha jinka duja parinay
aaya unhi ke nivruth hone ka nirnay
Sachin ne kar diya sabko vismay

rangmanch ke kai mahaaan hasti
chod gaye dekar unke yaadon ki smriti

desh ki raajdhaani mein bani AAP paksh ki sarkaar
vahi AP mein aaj bhi vibhajan par kar rahe hai haahaakar

hone chala hai telangana raashtra ka nirmaan
dekhna hai kya hoga iska parinaam

prakruti ne bhi dikhaya apna alag andaaz
global warming hai iska raaz

2013 ne dekhe kai utaar cadhaav
har din paar karte naye padaav

2014 ka hua hai aagaman
bani rahe desh mein shaanti aur naman
burai ko door kar khushiyon se bhar de ye chaman